賀賢早前憑「大情人」打破頭馬荒，可惜周四「搵銀天皇」搏輸，令其亞軍數目比起頭馬多近三分一，仍要急起直追，今期「鎏金驃」改配莫雷拉。
第五場三班草地1800米：「鎏金驃」落腳慢不是大問題，精神不集中才是最要命之處，賀賢忍得且有耐性，也許知道係好馬，未到位，不想太急求變，早在季初十月已見落眼罩操，等近四個月，到今次才肯替其加眼罩落場，更換埋雷神莫雷拉，有此兩大神器，對其都好正面。
睇晨操，不止一、兩次看到「鎏金驃」戴眼罩拍跳，呈現好的姿態，幾肯定眼罩會幫到佢，今次有埋莫雷拉，對手是未用眼罩時，都可拍住同到的「豐彩皇」及「將才」，繼續受讓磅，縱會由冷轉熱，都會買。
同場「將才」前仗有份中，上次睇到加磅後對其帶來阻力，限拖。「豐彩皇」再抽外檔點都會蝕章，同樣限配。「觀自在」近兩場跑法不知所謂，落班用巫顯東，唔知肯不肯搶放，若果肯，隨時唔同。「可愛寶」實力唔超，勝在有好狀態及潘頓之助。「魅力知友」來港前贏同程，上次初出跑超高難度的谷草一哩，排外檔都輸近，復課試多課閘，轉場、增程反而要吼實。
