王宗堯喺15年同Angelababy嘅師妹陳詩雅拍拖，嗰陣有報道話王宗堯揸住落地個幾月嘅50萬新車，由大坑送Sarah到銅鑼灣搵朋友食飯，轉頭再送埋Sarah返將軍澳村屋企，臨走前王宗堯仲攬實Sarah錫咗一陣依依不捨咁離開！事後王宗堯話大家係了解中，不過冇耐就已經分手！(新聞連結：http://bit.ly/2j2MTxp)
不過噚日陳詩雅俾《蘋果》發現同圈外男友入紙申請結婚，王宗堯被問到呢件事，佢話：「係喎，我之前喺ig都見過佢post啲求婚相，好事嚟㗎嘛，梗係好喇！」雖然前度結婚了，但係王宗堯都不愁寂寞，有讀者李小姐透過《蘋果》嘅「爆相爆片」，直擊噚晚8點幾王宗堯同女友人去咗登龍街一間東京米芝蓮一星拉麵店「蔦」(Tsuta)食晚飯！
講到嗰陣嘅情況，李小姐話：「嗰陣佢哋先喺門口排隊，之後再入咗去舖頭裡面等，嗰陣佢哋已經密密傾，大約過咗20分鐘左右就坐咗去Bar枱叫嘢食，佢哋各自各叫咗一碗麵同飯，食咗冇耐佢哋交換咗碗麵去食，食咗近30分鐘就埋單走人！」李小姐仲話：「嗰陣王宗堯拎住咗一部有長鏡頭嘅相機，出咗門口見到佢哋企咗喺度，最初我以為王宗堯自己揸住相機影女仔，但係原來佢哋係互相幫對方影相，真係好得意！」李小姐又話佢哋兩個都冇拖過手，但係一啲都避忌，好親䁥、自然咁傾偈同影相。
睇番啲相，嗰個女仔個樣有啲似As One成員Chloe，唔知嗰陣佢哋係咪拍拖行街街呢？王宗堯就話：「只係普通食餐飯啫，叫啲唔同嘅麵，大家share去食。」講到食飽飯都要喺門口影相，佢就哈哈大笑話：「唔係，係佢幫我影相，因為我有張相要post，冇理由自己影，所以咪搵佢幫手囉！」
 (讀者提供圖片) |  食叫定食啲乜嘢先！(讀者提供圖片) |  (讀者提供圖片) |
 (讀者提供圖片) |  (讀者提供圖片) |  女友影相姿勢似模似樣喎！(讀者提供圖片) |
 王宗堯話結婚係好事！(資料圖片) |
