陳瀅今日現身奧海城為體驗店擔任嘉賓，着住短裙都親自示範玩賽車遊戲。陳瀅之前因為工作證件問題缺席台慶，佢解釋話自己仲未申請到永久性居民身份證，佢話：「話咁快明年就係逗留香港第7年，o依家融入香港工作，好似畢業咁。」
陳瀅話今日活動係2017年最後一個工作，過幾日幫好姊妹陳嘉寶（Anjaylia）做完姊妹後，就會返加拿大放假至明年先會再見。喺黃金檔期放大假，陳瀅話：「公司慣咗，都肯放我走，因為我唔唱歌，年尾嘅騷比較少搵我做。」佢又好謙虛話：「話其實唔係唔想唱，係冇人搵我，我費事獻醜啦。」
講到做Anjay姊妹團，陳瀅話近日都同啲兄弟姊妹團見面希望大家可以熟落啲，預咗嗰日做妹仔不停服侍好友，佢哋已經計劃好有咩玩新郎遊戲，仲爆Anjay好錫住未婚夫，係個好貼心嘅老婆，然後又好感嘆話就快少咗個姊妹。
記者叫陳瀅佢趕快加入人妻行列，但陳瀅話：「o依家唔多想拍拖，自己單身咗一段都覺得幾好，拍拖成日都要報到，要講自己做啲乜 ，o依家幾自由。」言下之意係咪對上嘅男朋友箍得好緊呢？陳瀅話：「唔係，拍拖唔只我要報到，可能我都想知道對方做緊乜，下一段感情我會要求自由啲，會事先同對方講唔好成日打畀我，我未必會聽電話。」
 （攝影：卓寶花） |  陳瀅話今日呢個活動係今年內最後一個活動 |  過幾日就會做姊妹，之後返加拿大度假。 |
 陳瀅今日示範玩賽實遊戲 |  陳瀅話單身好似幾好，暫時唔想拍拖住。 |
