現年52歲嘅吳國敬一直想跟拍拖11年美甲店老闆Elaine共諧連理，可是女友遲遲未肯嫁，阿敬希望好快可以奉女成婚。不過佢哋兩口之家為添熱鬧，7年前收養了一隻金毛尋回犬金金，佢哋得閒就帶囡囡金金出外散步。
話說阿敬同Elaine都係火爆之人，佢哋經常會為雞毛蒜皮小事嗌一大餐，甚懂人性嘅金金則做「和事狗」撲火。兩人講到相處之道係又打交又鬧交，阿敬日前接受《蘋果》專訪時坦言：「我哋兩個都好火爆，以前嗌多啲，o依家少咗。我享受呢個關係，無論乜嘢年紀都一定有磨擦，可能亦係我哋嘅樂趣。」最近，Elaine為阿敬唔肯同佢call的士，佢喺facebook鬧爆男友，阿敬即申冤：「佢12點去葵涌學整餅，11點45分先叫我call車，我急去『爆石』，唔同佢call就係咁鬧。」Elaine反駁：「少少嘢都唔幫我，你可以帶住個電話入廁所，我化緊妝嘛。」
其實阿敬同Elaine嘅開拖對話喺事發當日都已貼出fb，火藥味極濃，Elaine抵死話：「fb係我哋戰場，唔熟嘅朋友睇到會勸交，但熟嘅當追劇咁追落去，冇得追就知道冇嘢。」兩人相處，十足十韓片《我的野蠻女友》真人版，佢哋即使嗌到火紅火綠，最後只有一個結果，阿敬氹番女友大團圓結局：「我下把到冇地位，金金（愛犬）係公主，佢（Elaine）係女王，我咪係李連英。」
Elaine大爆金金會做兩人「和事狗」：「我哋一嗌交，金金會推開我，或掩住佢個嘴，我會打佢出氣，我隻手控制唔到，我未掂到阿敬，金金就同佢擋，有時鬧交我離家出走，佢就send金金張相，叫我快啲返屋企。」
 攝影：林德雄、攝錄：廖達燊 |  吳國敬同拍拖11年嘅女友Elaine 7年前收養了一隻金毛尋回犬金金。 |  |
 阿敬同Elaine都係火爆之人，佢哋經常會為雞毛蒜皮小事嗌一大餐，甚懂人性嘅金金則做「和事狗」撲火。 |  |  |
