今日「Yahoo搜尋人氣大獎2017」頒獎禮喺尖沙嘴舉行，出席嘅藝人包括：惠英紅、李克勤、陳柏宇、周秀娜、王浩信、馬國明、李佳芯、張建聲、宋本中、C AllStar等。
其中今日係正日生日嘅李克勤連奪三獎，包括「本地男歌手」、「年度熱搜金曲」、「最具號召力香港男藝人」，大會仲安排咗壽包形狀嘅蛋糕比佢，同一眾英皇同門一齊切蛋糕。接受訪問時，佢就話：「今年係我23歲生日，校長都係25歲，我又點可以亂認幾多歲呢。」佢仲話已經習慣大時大節喺工作中渡過，又話尋晚已經同家人食咗飯，亦收到囝囝手作嘅禮物。講到生日願望，佢就話：「希望家人身體健康，佢哋都年紀大，身體多多少少都有啲問題出現。畢竟我23歲，我老竇都53啦！」
克勤仲話會抽多啲時間陪家人，佢又話：「其實每年都安排去一次旅行，嚟緊出年會一家人有老有嫩咁去旅輪旅行，去希臘。年中去嗰陣撞正世界盃，唔知到時船上有冇得睇。」佢仲話唔肯定到時會唔會現場睇世界盃。
 今日係正日生日嘅李克勤連奪三獎。 |  |  |
 一眾英皇同門都有獎攞。 |
