一年一度嘅台慶頒獎禮將於明年1月21號舉行，今日無綫舉行記者會，公佈提名名單，本來呢個頒獎禮喺12月舉行，但有傳為咗造大個聲勢，於是乎順延喺明年舉行，安排《溏心風暴3》加入，等個頒獎禮熱鬧啲。
不過今日大會只係公佈男、女主角同男、女配角嘅提名名單，出席嘅男主角只有馬國明、黎諾㦤同袁偉豪三個人出席。
黎諾㦤話：「男主角我今年會全力支持馬國明，因為我有睇《降魔的》，真係太厲害。」
被一致睇好做大熱嘅馬明，佢就話：「好感恩，我會努力為《降魔的》拉票，總之大家到《降》剔就得。」司儀話每年嘅頒獎禮，觀眾最期望睇佢嘅樣，唔知佢今年又準備咗個乜嘢樣呢？馬明就話：「好尷尬喎，嗰個係食白果樣，不過《降魔的》有個優點，係講鬼，陰人同人都可以投票。」
至於佢自己嗰一票，馬明就話會自己投俾《降》，之後司儀話咁心穎呢？馬明呆一呆唔識點答，之後尷尬話：「心穎，出年喇，《深宮計》。」袁偉豪：「得到公司俾我嘅愛，徐天堂呢個角色對我嚟講唔係主角，但係得到主角嘅提名，係感恩概，我自己得到迴響多過攞男主角，有機會提名係鼓勵，不過我希望三哥可以拎到。」
提名視帝嘅男藝人包括：
洪永城《味想天開》
黎耀祥《財神駕到》
黃智賢《親親我好媽》
羅嘉良《與諜同謀》
張兆輝《全職沒女》
林文龍《不懂撒嬌的女人》
王浩信《踩過界》
曹永廉《超時空男臣》
蕭正楠《超時空男臣》
陳展鵬《同盟》
黎諾懿《燦爛的外母》
周柏豪《使徒行者2》
苗僑偉《使徒行者2》
袁偉豪《使徒行者2》
郭晉安《老表，畢業喇！》
馬國明《降魔的》
歐陽震華《誇世代》
陳豪《誇世代》
夏雨《溏心風暴3》
黃宗澤《溏心風暴3》
 |  |  馬國明話平常心睇獎項。 |
 |  馬明話全力為《降魔的》拉票。 |  |
