荷李活巨星佐治古尼（George Clooney）出名慷慨，但估唔到佢慷慨到派錢！其好友Rande Gerber，亦即係超模仙蒂歌羅馥（Cindy Crawford）嘅富商老公爆料，佐治古尼4年前邀請14名好友到屋企聚餐，期間每人送上100萬美金（約780萬港幣）現金，甚至連稅都交埋，堪稱史上最慷慨朋友。
Rande Gerber接受節目《Headliners show》訪問透露：「我哋有班老友，叫做『The Boys』，有一日，佐治打電話同我哋講：『將2013年9月27日記喺你行事曆上，要去我屋企食飯。』」
當佢哋到咗佐治屋企，就見到枱上擺咗送俾每個人嘅設計師行李箱，佐治話：「聽住，我要你哋知道你哋對我有幾重要，我嚟到洛杉磯，瞓喺你嘅梳化上面，我好幸運生命中有你哋，如果唔係你哋，都唔會有今時今日嘅我。我們o依家仲係好友，呢件事真係好重要，所以我決定回饋，請你哋打開自己嘅行李廂。」
這14個朋友打開行李箱，發現裡面都係面額20美金嘅鈔票，共裝咗100萬美金，大家都好驚訝，問發生咩事。佐治話：「我知道我哋都經歷一啲艱辛嘅時刻，你哋有啲人仲係過得好辛苦，你哋唔使擔心子女，唔使擔心嗰啲，唔使擔心學校、房貸。」Rande Gerber指當中有人係月光族，有一個人於德州機場酒吧工作，每日踩單車返工，努力養家，「呢班人照顧過佐治，而家佢要回饋，仲話：『不只係咁，我已經幫每個人繳稅，所以呢100萬美元係你哋嘅。』」Rande Gerber本身都係個有錢人，他話當時唔肯接受佐治嘅厚禮，但對方話如果佢唔拎，就大家都冇得拎，最後Rande收咗之後捐俾慈善機構。
另外，佐治最近亦被爆出派隔音耳筒俾飛機乘客，因為佢要帶孖B上飛機，驚BB喊會嘈親人，所以將耳筒俾其他乘客，又寫上：如果BB喊，先行道歉。結果BB好乖全程冇喊，呢個舉動亦相當貼心。
 佐治古尼好友爆佢派錢！ |  當中有啲朋友好窮，所以佢想幫助大家。 |  |
