謝霆鋒主持嘅新一輯《鋒味》引爆爭議,有份參賽嘅「素食女王」Daphne Cheng被要求煮肉PK肉食達人煮素,結果Daphne選擇棄權退出,片段喺網上廣傳後,霆鋒被素食者狠批係公然欺凌同侮辱。


Daphne喺網上用英文留言:「他們答應過我的原則會被尊重,我不需要烹調肉類,當評判於第一輪表示下次我要烹調肉類時,因為我的中文能力有限我理解錯誤,而且他們其後亦一直表示我不需要煮肉,會允許我繼續當一名素食主義者。不幸地最終不是這樣,我本來希望能夠展示素食佳餚,讓中國看到這個節目。」


有份做主持嘅經理人霍汶希(Mani),向《蘋果》提供咗兩條短片:「我哋有條片,係同佢哋講咗,如果一個做肉,一個做素,如果調番轉,可唔可以再嚟比賽,呢個女仔話ok嘅,以證我哋公道。我哋畀埋現場錄影條片你哋睇,我哋係冇剪接過,佢係答應㗎,佢係識聽國語㗎。呢一段片係初賽嘅,如果佢唔接受,就唔應該再嚟準決賽,霆鋒一路都好尊重素食者,佢本身自己有時都會食素,唔會話歧視素食呢樣嘢,只係因為賽制問題,好似《Master Chef》當中都有比賽者係素食,佢哋都會煮,只係煮完唔會食,大家都好尊重對方,所以我覺得當你參選呢個比賽嘅時候,希望你會尊重番個賽制。」


節目喺噚晚播出新一集,嘉賓係王祖藍,Daphne冇份喺節目上亮相,Mani表示:「因為呢條係節目嘅前導片,而我哋會海選8強同霆鋒比賽,為求公道,公開招募,過程好透明,冇得黑箱作業。」





謝霆鋒主持嘅新一輯《鋒味》引爆爭議,有份做主持嘅經理人霍汶希(Mani),向《蘋果》提供咗兩條短片。(受訪者提供)