馬國明同黃心穎噚晚以情侶檔姿態到馬鞍山出席商場嘅除夕倒數活動，同場重有李佳芯同陳自瑤等等，呢次係馬明同心穎第一次情侶檔出騷，馬明話好pay啲啲。
喺倒數完迎接2018年嚟臨之後，《蘋果》記者就見馬明就一顯紳士風度揸佢部平治靚車，車心穎同經理人離開會場。馬明佢哋凌晨12點15分左右由上水離開，大約凌晨1點15分先見到馬明揸車駛到心穎鯉魚門嘅屋企。佢哋兩個見到記者都顯得有啲愕然，兩個人然後交換咗個眼色。記者問佢哋去邊度玩時，馬明就話:「冇玩呀，我哋做嘢吖嘛，你哋唔知咩？」記者話佢哋離開會場要成個鐘先送到心穎返屋企似乎好耐，馬明就話:「唔係，我要車埋佢經理人吖嘛。」記者問心穎有男友送返屋企好sweet？但佢就好無奈咁笑住話:「唔係，佢送我返屋企啫。」
之後心穎攞番車上啲嘢，就落車上樓，就喺同一時間，佢家姐黃心美就孭住個大袋落樓，企喺馬路唔知等人嚟接定想截的士，但當心美見到記者時，即嚇咗一跳左閃右避勁尷尬咁笑住話:「唔好啦(影相)。」記者話咁夜仲去街，心美就繼續好尷尬咁避鏡頭，然後索性返番上樓唔去街，似乎真係等緊男友嚟接，但唔想被記者見到真身咁款。
 馬明活動後好細心咁車黃心穎返屋企。 |  馬明話先車咗心穎嘅經理人返屋企，所以先咁遲先送到心穎。(採訪、攝影：徐錦池、孔志豪) |  |
 心穎BB自己一個人返上樓。 |  其間心穎嘅家姐黃心美出街。 |  見到記者勁尷尬。 |
 馬明噚晚同黃心穎一齊喺上水出席倒數活動。 |
