講起36歲嘅梁嘉琪，相信大家最熟悉嘅都係佢主持《學是學非》時候嘅大癲大喪，不過原來梁嘉琪係演藝學院出身，一路以嚟都有參演舞台劇，而除咗主持同舞台劇之外，第一次擔綱演出電視劇就係09年嘅《學警狙擊》，可能因為係舞台劇出身嘅關係，喺《學警狙擊》嘅演出被觀眾話佢太用力太浮跨，不過自此之後，佢喺唔少電視劇集例如《愛我請留言》、《師奶Madam》、《師父明白了》等都有出色嘅演技發揮，而觀眾亦開始有正面迴響。
其實喺演藝出身嘅，不得不提今年46歲嘅「師姐」康華，舞蹈系畢業嘅佢經由參選94年港姐而加入大台，至今已經演出過百部電視劇，無論反派定正派、粗獷或溫柔，康華嘅演出都恰到好處，雖然多年嚟都係飾演配角居多，但係深厚嘅演技廣受觀眾認同，更加唔洗講廿幾年如一日嘅美貌。
演藝出身嘅仲有07年因參選港姐加入大台嘅仲有黃智雯，不過黃智雯再經由藝員訓練班洗禮之後先正式參演電視劇集，09年參演《巴不得爸爸》飾演眼鏡妹開始被觀眾留意，「四眼娘」形象更被網民稱為女神，其後嘅《居家兵團》、《怒火街頭》、《潛行狙擊》等都擔任重要角色，而佢嘅演技亦都不負眾望更上一層樓，之後嘅《缺宅男女》、《飛虎》、《On Call 36小時》等都大獲好評。
近年嚟講，演藝學院出身嘅仲有舊年結婚生B、現年31歲嘅賴慰玲，喺演藝畢業之後由學院老師羅冠蘭推薦入大台，成功獲得《女人俱樂部》少女版許珍妮一角，之後更擔綱拍住鄭嘉穎演出《殭》大獲好評，同年就再時同鄭嘉穎合作拍攝劇集《迷》。
雖然話演藝出身嘅個個都係好戲之人，但係講到際遇，33歲嘅何遠東就冇上述幾位咁好運喇，08年喺演藝畢業之後加入大台嘅佢一路都只可以飾演閒角，不過有實力一定會有出頭呢句說話亦都不無道理，事關何遠東喺《心理追兇Mind Hunter》雖然係飾演單元配角，但係劇中佢演繹一名被受壓迫多年嘅精神病患者入形入格，開始受觀眾讚賞，之後《降魔的》嘅「龍貓」雖然都係配角，但係喺短短嘅戲份中已經感動到唔少觀眾，演技大獲好評。
