林峯、蔡卓妍、張繼聰、盧慶輝、方中信、溫碧霞等今日喺圓方出席網劇《PTU機動部隊》發佈會，5年冇返香港拍劇嘅林峯，喺劇中飾演PTU，仲係蔡卓妍嘅下屬，首次以制服示人嘅林峯，佢笑指由細到大都想制服誘惑，不過冇諗過做警察。佢透露呢套劇已經開工，會拍到3月底。雖然佢已約滿英皇，佢話：「好多謝楊生，過往我哋合作得好開心，當我離開之後，佢哋嘅計劃都有預我。」林峯表示現時簽約古天樂嘅經理人，係咪會自組工作室？佢話：「我想先搞掂自己嘅工作，0依家自己仲努力緊，尤其係內地，都想有唔同嘅嘗試。」提及佢同吳千語嘅感情，林峯即刻話：「佢0依家喺橫店拍緊嘢，好忙，我哋有keep住聯絡，但感情就唔講，講咗咁多年，要講都講晒，多謝大家關心。」有傳吳千語搭上富二代？林峯笑住話：「呢啲你問佢，佢都係藝人，唔使我代答。」
講到蔡卓妍一頭假髮，佢解釋係因為0依家做緊演唱會，所以唔可以剪短頭髮。對於佢有場爆炸戲，佢話：「當日拍嘅時候，我要就機位，所以企近咗，點知一炸，啲碎物彈到我塊面，瘀咗少少，但係安全嘅，所以我唔怕毁容。」
已有18年冇喺香港拍劇嘅盧慶輝，原來喺呢段日子入面，佢喺內地做過房地產同文化公司。今次返嚟過戲癮？佢話：「都唔係，我諗住係正職。」提及感情生活，慮慶輝指自己已結婚7年，囝囝都已經4歲，現時喺北京定居，佢話：「個仔好玩到不得了，追都追佢唔到，我有打算再追多個。」
張繼聰表示無綫台慶當晚，喺屋企睇電視支持。講到佢雖然去唔到，但監製上台領奬時有提及佢個名，張繼聰笑住話：「監製有雷！其實冇可惜，完成呢個章節係好開心。」
 攝影：沈健程 |  林峯、蔡卓妍、張繼聰、盧慶輝、方中信、溫碧霞等今日喺圓方出席網劇《PTU機動部隊》發佈會。 |  提及林峯同吳千語嘅感情，佢就話有keep住聯絡，但感情就唔講。 |
 講到蔡卓妍一頭假髮，佢解釋係因為0依家做緊演唱會，所以唔可以剪短頭髮。 |  張繼聰表示無綫台慶當晚，喺屋企睇電視支持。 |  已有18年冇喺香港拍劇嘅盧慶輝，原來喺呢段日子入面，佢喺內地做過房地產同文化公司。 |
 同劇仲有方中信、溫碧霞等。 |  |  |
