陳錦鴻同趙頌如今日到樂富出席港台主辦嘅《睇得開心擁抱童真》活動，錦鴻仲帶埋太太同囝囝陳駕樺現身，問到日常親子活動，佢話：「每日都會陪食早餐着校服同車佢返學，平時就會行山、行郊野公園。」而日常學業方面佢就由太太負責，自己就主要跟囝囝傾心事。
錦鴻話好鼓勵囝囝早啲學懂識女仔，佢話：「佢今年十歲，早喺八歲嘅時候我就好鼓勵佢主動向心儀嘅女仔傾偈，其實係希望佢學識勇於表達同埋溝通，唔係真係想佢咁早就拍拖，我希望佢可以十六、七歲先至真正開始拍拖，因為淨係靠講解佢好難明白，必定要佢親身試過，佢先識了解到，同埋 希望佢知道喺屋企談論情感並不是禁忌。」
錦鴻又表示作為爸爸都會主動分享自己喜歡女仔嘅類型：「佢話有時一家人坐低睇電視，我都會主動講爸爸覺得呢個女仔幾靚，你覺得點睇？自己先做一個示範，令佢夠膽佢講出自己睇法，同埋又分享自己嘅戀愛經驗，啱嘅唔啱嘅我都講畀佢聽，等佢自己可以多啲Data日後可以用得着。」問到同囝囝講以前嘅拍拖經驗，太太喺身邊會唔會聽到會唔會呷醋？錦鴻笑話：「呢啲話題只會喺兩仔爺傾計嘅時候講。」
另外，趙頌茹(Yu)就透露新年期間帶咗大女去日本滑雪 ：「佢話因為細女年紀太細，而且我怕一個人帶唔到佢哋兩個，所以今次就淨係帶大女去，其實我哋兩個都係初學者，所以去到係各自跟教練玩，但都係一個好開心嘅經歷。」淨係帶大女去，細女會唔會投訴？阿Yu話：「其實都有少少，呢排都好扭計，我有同佢講下次帶佢去第二度補番數。」
 陳錦鴻話同囝囝嘅親子活動就係行山同行郊野公園。 |  錦鴻今日仲帶埋太太同囝囝出席活動。 |  趙頌茹 |
