韓國男星權相佑與演員老婆孫泰英結婚多年依然恩愛，孫泰英不時喺Instagram放閃。近日權相佑正忙於拍攝新劇《推理的女王2》，不過忙極佢都抽空見老婆，認真恩愛。


孫泰英噚日喺Ig上載咗幾張相，包括同權相佑一齊坐嘅背面照以及友人照，並表示權相佑於夜晚先開工拍攝，晏晝就孖住自己出席友人嘅聚會，仲加上心心符號向老公示愛，十分甜蜜。


而孫泰英見友人前，先送3歲愛女返幼稚園，只見囡囡利浩綁住孖辮，自己孭背囊及拎住個袋，相當可愛。不過孫泰英就笑指囡囡越嚟越有主見，只做自己想做嘅嘢，只着自己想着嘅鞋。