大台近年啲姐仔走得七七八八，本來都有「小花」陳凱琳、蔡思貝同李佳芯頂住，不過佢哋之前分別擔正唔少劇做女一，觀眾成日睇都覺得悶喇，最近大台力捧江嘉敏同馮盈盈，江嘉敏年紀細，加上性格熱情，受得許多男藝人愛錫，23歲江嘉敏自認男仔頭性格，成日主動撩男藝人玩，之前同王浩信去英國拍外景，已傳佢同人夫王浩信過從甚密，王浩信為保形象即同江嘉敏劃清界線。
今日有周刊指江嘉敏又有另一個「目標」就係黃嘉樂，早前佢哋一齊拍《果欄中的江湖大嫂》，成日玩埋一堆，由於佢哋喺劇中演情侶，不時有對手戲，所以二人喺片場雞啄唔斷同影selfie，經常約埋一齊食飯，未埋位都似足情侶，黃嘉樂唔只將相放喺IG，連朋友圈都有擺佢同江嘉敏啲合照，有朋友就「溫馨提示」黃嘉樂，話好少見黃嘉樂貼一個女仔相，po得咁密。
據報道指黃嘉樂於一年幾前喺工作上識到攝影師女友Samantha，拍拖以嚟感情穩定，黃嘉樂更指對方結婚對象。o依家忽然走出江嘉敏，未知會唔會受影響呢!?
