網絡歌手Judas Law、胡鴻鈞、菊梓喬(Hana) 今日喺在銅鑼灣皇室堡出席復活節活動，三人分別同Fans玩遊戲及獻唱。Judas成為網絡歌手後簽約經理人公司，接多咗好多商演活動。
Judas早幾個月喺大埔街頭busking，一把靚聲喺唔同地方洗版，早前佢應邀到馬來西亞演出，順道喺當地宣揚busking文化，不過就有啲挫折：「最初未係好起哄，轉咗幾個地方先適合，自己唔熟識當地，知道有保安趕，加上落雨。」稍候公司會安排佢出新歌出碟。Judas不避嫌喺網上公開女友溫馨照片，佢話：「女朋友都有一齊同行去馬來西亞，一齊玩下散心。」問到佢唱歌時候會唔會刻意望住女友？Judas話：「唱失戀歌就唔會，唱情歌時候有時都會忍唔住望住佢，不過唔想專登，因為覺得好尷尬。」
胡鴻鈞上月底28歲生日，朋友帶佢去日本福岡驚喜旅程慶祝，玩咗五日，佢堅稱係有男有女一班朋友，不過許廷鏗就冇同行，仲話自己好多圈內朋友。胡鴻鈞話：「尋晚返香港同許廷鏗同一班朋友食飯、切蛋糕慶祝，食飯就係佢地送畀我嘅最好禮物。」大家講笑問佢許廷鏗有冇獻吻？胡鴻鈞笑笑口話：「冇呀，咁我都要檢討下自己。」菊梓喬復活節狂食朱古力增肥， 現時體重已經超過100磅。
 網絡歌手Judas Law、胡鴻鈞、菊梓喬(Hana) 今日喺在銅鑼灣皇室堡出席復活節活動。 |  早前Judas應邀到馬來西亞演出，佢順道喺當地宣揚busking文化。 |  胡鴻鈞上月底28歲生日，朋友帶佢去日本福岡驚喜旅程慶祝。 |
 佢堅稱係有男有女一班朋友，不過許廷鏗就冇同行。 |  菊梓喬復活節狂食朱古力增肥， 現時體重已經超過100磅。 |
