噚晚林子善擺酒，場面熱鬧過台慶，曾志偉、陶大宇、黃心穎、苟芸慧、郭鋒、胡楓、黃日華、江美儀、韓馬利、蔣家旻、岑麗香及陳煒等，一大堆TVB藝人到賀，子善揀喺將軍澳設宴，方便一眾老友開完工就可以嚟飲。


馬國明同鄭嘉穎做兄弟，馬明負責幫林子善頂酒，女友黃心穎爆馬明醉咗會好開心，心穎BB仲叫子善老婆做「阿嫂」，睇嚟佢都好快加入「鐵馬家族」，心穎仲爆馬明自封千杯不醉，叫大家拭目以待，至於陳凱琳目前身在橫店開工，所以冇同鄭嘉穎一齊現身。


全晚眾星好似開聚舊party，係咁瘋狂selfie，阮小儀喺IG貼出咗兩張合照，話喺子善婚宴可以集好多郵，不過小儀只係放咗與偶像黃日華及尊敬嘅修哥合照上網；而「長腳蟹」呂慧儀貼出咗好多相，與一班好友難得聚埋，呂慧儀亦祝子善新婚快樂、三年抱兩。


煒哥同子善早前一齊拍《果欄中的江湖大嫂》，子善演果欄少東「蓆仔」，煒哥演「大巴」，煒哥噚晚就同「小巴」岑麗香影合照，留言：「大巴同小巴祝福蓆仔永結同心，幸福一輩子。」相中見煒哥以一身民初年代嘅包租婆look示人，估計佢噚晚要為新劇《危城First Lady》開工，衫都未換就趕去子善婚宴聚一聚，之後應該要趕返去再埋位。


黃心穎、林子善、馬國明煒哥、岑麗香「KC」歐瑞偉、「Helen姐」姚瑩瑩