林峯拍完《PTU機動部隊》收工趕咗去林子善餐喜酒，佢話：「其實子善個幾月前已經問我到唔到，當時自己都未知通告，答咗佢盡量囉！好彩今日早咗少少收，所以即刻過嚟。但唔記得帶衫，所以頭先即買即換。」
問到現身單身嘅，嚟到呢啲婚宴場面會唔會覺得傷感？林峯話：「唔好講呢啲啦，今日係喜慶事，係要開心嘅，同埋今日好多台前幕後嘅人喺度，難得大家可以咁樣一聚，所以都會盡興吓。」佢仲笑言：「戰況可能會好激烈！」
問到佢會唔會搵林盛斌（Bob）飲番幾杯？林峯就話：「其實阿Bob都少飲咗，不過我同吳卓羲就可以挑戰吓。」
 （攝影：葉君海） |  林峯一收工就趕嚟飲，仲買咗套新衫嚟換。 |  |
