即將喺5月11至13號假紅館舉行演唱會嘅古巨基，今日喺灣仔出席《WE 我們古巨基世界巡迴演唱會 香港站特別版》記者會 ，演唱會門票將喺聽日(4號)公開發售，但記者會上基仔就率先宣布加開14號一場，總共四場演出，基仔特別向讓出紅館檔期嘅五月天致謝，等佢可以有一個突如其來嘅紅館演唱會。
事隔7年再喺香港開騷，基仔稱到時將會大唱經典金曲， 而且更預先透露會喺演唱會上分享同太太嘅相處點滴，佢話：「人生有唔同嘅階段，我上次開騷嘅時候都未結婚，今次已經成為人夫，所以都會想喺台上同大家分享結婚後嘅感受。」 問到會唔會叫太太上台？佢話：「好難呀，佢一定唔肯，唔想佢個樣嚇親大家，但係我會講吓我哋平時相處嘅嘢。」咁使唔使事先畀太太過目？基仔話：「唔會畀佢過目㗎啦，我話事。」
門票將喺聽日發售，問到基仔又擔唔擔心到時出現絕望座位表？佢話：「作為表演者其實對於售票情況都唔太了解，但我真係好希望歌迷們都可以用正價買到門票。」黃子華曾經表示寧願喺自己演出上見到吉位，都唔希望觀眾買黃牛入場，基仔又點睇？佢話：「我都好支持呢個做法，既然飛佢哋已經買咗，冇人幫襯就唔會有供求，大家一齊攬炒咁樣先至可以杜絕。」
基仔又話作為表演者，真係唔希望歌迷用一個好貴，甚至負擔唔到嘅價錢去買飛，至於實名制購票基仔又點睇？佢話：「我未試過，但如果技術上解決到，又唔影響到觀眾入場嘅，我覺得可以支持。」
 (攝影：葉君海) |  記者會上基仔就率先宣布加開14號一場 |  |
 門票將喺聽日發售 |  |  基仔又話作為表演者，真係唔希望歌迷用一個好貴，甚至負擔唔到嘅價錢去買飛 |
