無綫劇《果欄中的江湖大嫂》，吸引一班網民追睇，有人自封「迷盈黨」主力睇「小狼女」馮盈盈演得有幾放，亦大讚佢演MK妹角色唔錯，又有人專睇宅男女神江嘉敏。噚日播嗰集講「勇哥」黃嘉樂為救「黃友美」江嘉敏，而被演大佬Kent嘅李天翔用石頭擊「勇哥」後腦，於江嘉敏懷抱中離世，江嘉敏同馮盈盈傷心爆喊、肝腸寸斷，一眾網民都讚馮盈盈同江嘉敏喊戲做得好過陳凱琳同蔡思貝，尤其係拍戲經驗更少嘅馮盈盈，令人眼前一亮，感情流露得好自然，冇用誇張表情去表達痛失家兄之情。
另有網民覺得江嘉敏喊戲明顯好過馮盈盈，有兩幕喊戲，令人印象深刻，其中一幕黃嘉樂喺崖邊，江嘉敏抱住佢時，一路喊到成身震晒，鼻水都湧埋出嚟，當「勇哥」臨死前講唔想見到江嘉敏唔開心，江嘉敏勉強擠出笑容，畫面令人心酸。
另一幕係江嘉敏回想「勇哥」生前好鍾意聽佢彈琴，江嘉敏一邊彈鋼琴、一邊大大滴眼淚流，似由心底嘅傷感喊出嚟!
「小狼女」馮盈盈喊嗰場係講佢係「勇哥」嘅唯一親人，要去停屍間認屍，原先好淡定，但一見到「勇哥」屍體，佢忍唔住講出「勇哥」好錫佢，去邊都會帶埋佢，一時接受唔到阿哥已經離世，眼淚唔似夾硬谷出嚟，有網民指馮盈盈演技一向好放，希望佢可以學識喺演平常對話戲可以「收多過放」，同埋學吓咬字，唔好咁多懶音，相信未來發展會唔差，亦有網民指馮盈盈演主要角色嘅經驗淺，可以做到同江嘉敏差唔多水準已經好好，因為江嘉敏喺入無綫前，已經拍過電影《曖昧不明關係研究學會》及《此情此刻》，又讚馮盈盈喺戲路上知道自己嘅角色定位，比較麻甩帶性感嘅路線，有時仲口不擇言。
此外，江嘉敏剛出喺IG貼出合照，留言問「小狼女，我求吓妳俾番勇哥我！妳收埋咗佢喺邊吖？我求吓妳吖」，演「勇哥」嘅黃嘉樂搞鬼回覆：「去咗黃泉流浪。」唔少網民都唔捨得勇哥就咁死，「我好希望認屍嘅時候勇哥突然間醒番」、「睇到想喊」、「要求編審續集，俾粒起死回生藥」、「琴日睇到我跟住黄友美喊呀」，而黃嘉樂則安慰網民，叫大家唔好咁認真，只係劇情嚟；之不過有網民討論劇情時「突破盲腸」指TVB劇情多數跌落懸崖嘅人都未必會死，咁原先不慎「差錯腳」跌落崖嘅江嘉敏又真係冇死，反而救江嘉敏嘅「勇哥」就要死。
精選娛聞，喺晒《娛果》
http://fb.com/appledailyent
