陳煒今朝拍完劇，下晝就中門大開索爆咁同馮盈盈現身圓方擔任電訊公司活動揭幕嘉賓，工作無休嘅煒哥希望年尾有個時間到海邊或小島，享受一個寧靜假期叉電。最近劇集令兩人人氣急升，連活動都係一齊拍住搵錢，盈盈賣口乖指全靠煒哥帶挈先有錢搵。
煒哥久唔久就騷騷弗爆身材，問到會否考慮拍寫真？佢笑住話：「冇諗過出寫真，我唔識賺人錢，久唔久派吓福利畀大家就夠。」之不過煒哥指福利相通常係自拍，所以影到身材只係有限。嚟緊下一套劇要著泳衣，所以要開始食清淡啲。
盈盈喺劇中一幕喊戲大獲好評，煒哥都大讚佢做得好，盈盈都好緊張呢一幕戲，男友都陪佢一齊睇，並表示估唔到佢喊得出，問到拍攝時諗緊乜？佢話：「我當時諗緊死老竇，因為我本身無阿哥，劇中講長兄為父，所以我要多謝我爸爸。」盈盈笑指只留意到自己喊得好肉酸，但大家指這才感染力。
 馮盈盈拍劇演出自然，連喊戲都好評如潮。 |  佢透露，當時係諗住死老竇先喊得出。 |  盈盈又賣口乖指全靠煒哥帶挈先有錢搵。 |
 煒哥今日就好性感，佢希望年尾有假期叉電。 |  |  重溫一下，馮盈盈係點樣演呢場喊戲。(電視截圖) |
