現年33歲嘅韓劇《咖啡王子》女星尹恩惠，大前年演出大陸節目《女神新裝》時涉嫌抄衫而形象插水，遭韓國網民炮轟，導致佢與男星朴時厚合演嘅愛情電影《愛情後愛》被推遲上映外，以及佢之後現身或去年演出綜藝節目《需要對話的狗貓》時都仍然被網民鬧爆。
久未現身嘅尹恩惠不時傳出會拍新劇復出嘅消息，今日再有報道指佢有望飾演劇集《心動警報》嘅女主角。劇集改編自人氣網絡小說，講述雖然不乏女性追求、但對戀愛毫無興趣嘅皮膚科男醫生車友鉉，與出道15年因首次傳出緋聞而陷入退出演藝圈危機嘅大明星尹友珍嘅契約戀愛故事，有指男主角或由韓劇《Master-麵條之神》37歲男星千正明演出。
如果報道屬實，將係尹恩惠繼《未來的選擇》後事隔5年回歸公仔箱。而尹恩惠所屬事務所就表示「只收到劇本，尚未落實演出」，不過依然有網民唔賣帳，紛紛留言表示不滿。
