現年34歲嘅新任視帝王浩信自從拍完套《踩過界》之後人氣急升，入面盲人律師嘅造型真係殺死人，不過，現實中佢被人發現無視行人過路燈嘅指示亂過馬路。
本報讀者林先生透過「爆相爆片」話視帝踩車冇注意安全首則，林先生話:「上星期六大概12點幾，我揸車經過環保大道，見到王浩信踩住單車橫過行人路，第一戔燈佢都有跟行人過路燈，不過第二盞佢可能等唔切，紅公仔都照過。」從林先生提供嘅片段見到，視帝一身單車運動裝扮，孭住大袋由日出康城方向踩住部單車去到燈位，佢過行人過路線時，冇落車用腳尖半踩半推咁橫過馬路。到第二戔燈時見佢等咗10多秒後，雖然過行人路燈仍然顯示紅公仔，但王浩信可能趕時間，見冇車就咁踩過馬路。
其實根據香港條例，所有踩單車人士，喺橫過馬路嘅時候，都要落車推車，而唔可以踩住單車過，所以佢應該犯咗兩條例，不過有陣時政府嘅條例又真係有啲過時，特別係對單車人士嚟講，單車路一節節咁又真係幾令人無所適從，不過講到尾，法例無論大與小，最好都係唔好犯啦。
 |  本報讀者林先生透過「爆相爆片」話視帝踩車冇注意安全首則（讀者提供圖片） |  從林先生提供嘅片段見到，視帝一身單車運動裝扮（讀者提供圖片） |
 到第二戔燈時見佢等咗10多秒後，雖然過行人路燈仍然顯示紅公仔（讀者提供圖片） |  王浩信可能趕時間，見冇車就咁踩過馬路。（讀者提供圖片） |
