日本樂壇傳奇女星山口百惠喺1980年嘅事業高峯期決定引退，同三浦友和結婚，並育有兩子，多年來堅拒復出，低調做賢妻良母。


最新一期雜誌《女性自身》搵咗三浦友和外甥絲木建汰受訪，大爆山口百惠私生活一面。絲木建汰指三浦友和同山口百惠結婚38年依然恩愛，完全冇見過佢哋鬧交，更會於結婚每個10周年記念，就會買一對新嘅結婚戒指：「叔父因為工作關係唔會經常戴婚戒，但於兩人去旅行時，佢就會好開心咁戴住婚戒起行。」三浦夫婦將迎接結婚40年，即兩人將會購買第四對婚戒。


絲木建汰話山口百惠於鏡頭前形象好Cool，但佢自小就得山口百惠成日笑同埋好溫柔。山口百惠引退後都鍾意唱卡拉OK，絲木建汰話去叔父屋企唱K時，山口百惠會唱生物股長、JUJU同Superfly作品，但就唔會唱自己嘅歌，佢指記得一次自己唱山口百惠作品，山口百惠即時喺隔籬伴舞，但就畀兩個仔祐太朗、貴大笑阿媽跳得好老土。



山口百惠與三浦友和結婚38年，依然恩愛。佢哋於結婚每個10周年記念，就會買一對新嘅結婚戒指。34歲大仔三浦祐太朗。
32歲細仔三浦貴大。外甥絲木建汰受訪大爆山口百惠與三浦友和私底下一面。